Nálgunin

Rakel Rán notast við tengslamiðaða fjölskyldumeðferð með áherslu á geðheilsu ungra barna og umönnunaraðila þeirra. Meðferðin byggir á fjölskyldumeðferð, tengslakenningum (e. attachment theory) og sálgreiningu (e. psychoanalytic models) og er studd af kenningum um þroska barna (e. child development theory) og rannsóknum í taugavísindum. Á ensku er talað um meðferðir af þessu tagi sem Parent-Infant meðferðir og eru þær notaðar allt frá meðgöngu til fimm ára aldurs barns, misjafnt eftir aðferðum þó. Þegar talað er um foreldra í þessu samhengi á það við um alla foreldra, óháð því hvernig foreldrið kom inn í líf barnsins.

​

Foreldrar eru mikilvægustu aðilar í lífi barna sinna og eru sá utan að komandi þáttur sem hefur mest áhrif á mótun barnanna. Foreldrar eru líka þeir aðilar sem þekkja börnin best og eru best til þess fallnir að aðstoða börn á þessum aldri. Því kemur að minnsta kosti eitt foreldri með barninu í meðferðartíma. Með börnum sem hafa náð eins árs aldri koma foreldrar þó einir í meðferðartíma þegar þörf er á að tala hispurslaust um tilfinningar og reynslu foreldranna. Það er gert til að hlýfa börnunum við upplýsingum sem þau hafa ekki þroska til að taka á móti.

Ásamt því að hjálpa barni eða foreldri með erfiðleika sína er ávallt unnið að því að styrkja sambandið á milli þeirra og ýta undir örugga tengslamyndun barns við foreldri sitt og heilbrigðan þroska barnsins. Enda eru örugg geðtengsl ein mikilvægasta forsenda góðrar geðheilsu barna og fjölþættri getu þeirra til að njóta sín í leik og námi.